Alibata - Kapit nang mahigpit, Edong

ni:Arnel D. Arce

Ayaw kong humalagpos sa iyong pagkakahawak,
Dahil sa pagbitiw ay muling mangungulila
Sa isang tapat na kaibigan.

 
Edad natin ang agwat ay tulad ng sa isang mag-ama
Hindi bumabalakid upang maintindihan
Ang mga bagay na sa mundo’y malahiganteng katanungan.
 
Isang mahigpit na pisil sa aking kamay iyong idinantay.
Nang maramdaman ang init ay bumabalot sa buong katawan,
Nagbibigay tibok sa pusong sa pag-asa’y nawawalan.
 
Ngunit mapanuring mata ay humuhusga sa pagtitinginan,
Inaakalang ang relasyon ay di ayon sa normal,
Pinipitpit ang ugat hanggang mamatay.
 
Walang salita ang namutawi sa ating labing tikom:
Ginagawa’y ang pagtitig na lulusaw sa pader
Na humaharang sa magkaibigang ginugupo ng pagtataka.
 
Higpitan mo ang hawak, Edong.
Huwag kang bibitiw sa hagupit ng pagsubok.
Katapatan ang ibigkis sa mga kamay.
 
Arnel D. Arce
90 Landing Iyam
4301 Lucena City