Alibata - Tula ng isang Ina

ni : Honesto M. Pesimo, Jr.

Simbolismo ang tilaok ng tandang
At ang aking pagkakabalikwas
Ay ang paghahanap ng mga salita.
Ritmo ang pagpapatahan sa nabiglang anak

At indayog ang paghehele rito
Kahit na nga ang kumot nitong mapanghi
At metaporang basa
Sa inihahandang tula.
Kaalinsabay ng pagpaparami
Ng kabuluhan ng mga bula ng sabon
Ay ang pagpapalutong
Ng sensibilidad na inihahanay
Sa realidad at lipunan
Sa pagpiprito ng tuyo at talong.
Pagkatapos ay uunawain ko ang sukat
Ng kaugalian at kultura
Sa estilo ng paghahanda
Ng baon at gamit sa eskwela.
Halik ng pamamaalam
Ang dagdag na kataga.
Sa pag-iisa’t bisa ng pamamalantsa,
Nangangarap ako na kikinis ang mga tayutay.
Pero ang tensyon ay bulyaw ng tinidor sa natirang kanin,
Sigaw ng kutsara sa halik ng kuratsa,
Dabog ng pinggan sa kumapit na sebo,
Bahing ng baso sa lansang dumikit
At ang mesa’y ulila pa rin sa kanin
Na bihag ng kalderong sinasampal ng apoy.
May tampo pa rin ang laing
Na nilulunod ng pinigang kakang-gata,
May hinanakit pa rin ang mangga
Na hindi pa napipitas sa bakuran.
Pero may kamatayan ang tensyon.
Sa pagdating ng aking mga anak,
Tula ang kanilang halik at yakap.

Honesto M. Pesimo, Jr.
13 Santa Cruz Proper
4400 Naga City